+ پری یاز گلمیش

آهای پری قیش گئدمیش دونیا دونمیش یازا گول گولو چاغیریر ، چوللر سونالار ماواسی اولموش ،های پری ائشید چای لر سه سینی گور نیجه یئر هنه سی یئنگی لشمیش گور نیجه گوی اوزونه گولوش گلمیش ،پری نچی گونونگ گورمه لرینی اوزونگ اوستونده گورمیرنگ ؟ نچی یئلینگ ائسدیگنی جانینگدا بیلمیرنگ ؟

یاز گلمیش پری گول ،اوینا ، ییرلا ، سن هااااااااااااااااااای چک . پری ده لی اولما ایل تازالانمیش گچن گونللری بئیندن چاغارد و گوز گلن گون لره تیک . اینان کی گله جک گوزه ل اولاسی دیر آما بیله جک اول کی بو یاز داها هئچ زامان گئری دونماز

نویسنده : فتانه مرادی قره قانی ; ساعت ۱۱:۳٩ ‎ب.ظ ; ۱۳۸٩/۱/۱۸
تگ ها:
comment نظرات () لینک


+ دئریلیگ تامداری

دئریلیگدن بیر تامدار اوزاد بیر تب گوندوزدان بیرده گئجه دن توخو بیر ایلمه محبت نقشیندن وور بیر کرکید سئوگی گورگو سیندن.

بیر گوز آغلاماگ ایچون ،بیر دوداغ گولمگ ایچون ، یاسلی گئجه لرده قره بویا،قره گئجه لر آراسیندا ساری اولدوزلاری یئر وئر یاز گونلری دا گویناقلی اولاندا قوماشان گوللاردان بیر تب توخو قیپ قیرمیزی یا کی ساپ ساری.

بیر یول توخو یولدان گلن چز بیر اوره گ اوره گ آپاران چز.قره چادری توخو یورولماگ کرز یاتماق ایچون گون توخو اویانماگ کرز ایچون.

بیر بولوت یاز سو اوزه چالماگ ایچون، بیر اوت توخو چیله به در ایچون اوبا قیش یوردوندان کوچنده.

قرانلیق گئجه لرده اوت اووره سینده ییغیلنده و عاشیق سلزینان چالاندا یا اوشاق لای لای اینان یاتاندا واری سینی تامدارینگدا بیر توخو.

آغ توخو اوندا کی بیرچگ لرینگ آغ آپاغا آپاردی...... ایندی بیر گئری دون باخ اینانیرنگ کی دئرلیگ تامداری توکنمیش و داها که سیله سی دیر

نویسنده : فتانه مرادی قره قانی ; ساعت ۱:٥٩ ‎ب.ظ ; ۱۳۸۸/٦/۱٩
تگ ها:
comment نظرات () لینک


+ من قوشما سیرم

من قلمه حسرت چکیرم و یازدیگینه آه ،قوشمالاره یاش

توکیرم من یازانینگ دویغوسونه گوونیرم بئله بیل

 قوشمالار وایاسیندان من یاسلیام آما اینانمیرام بو دونیادا

 بیر قوشما دا  منه پای اولا .سوزلر دیلیمده قالمیش یازغی

لر قلم باشیندا قوروموش ....

های یازان لار منه بیرقوشما پای ائدن یوخ ؟

نویسنده : فتانه مرادی قره قانی ; ساعت ٤:٠٢ ‎ب.ظ ; ۱۳۸۸/۳/٢٤
تگ ها:
comment نظرات () لینک


+ سیرم ده لی اولام

داها سیرم ده لی اولام یالاندان قچم ،داها سیرم یئره باخمایام گویلاردا اوچام سیرم ده لی تک یا چوخ سوه م  یا سوه مه یم  . 

ده لی گوزگو لری قیریر کی مینگ دانا اوزوندان گوره  نه تک اوزو ،ده لی  اوزو ایچین هئچ سمیر هئچ یوخو  ، ده لی اوزوندن هئچ دئمیر . 

 ده لی آغلایاندا بیر غیغیه آغلاییر آما گولاندا مینگ غیغیه گولوش ووریر .

ده لی یئده گویدا بیر اولدوز یوخو ده لی اه وی تورپاقلی یئر و سقفی گونلو گوی دیر .

ده لی نه سو مه لی دیر  .

داها سیرم ده لی اولام .

نویسنده : فتانه مرادی قره قانی ; ساعت ٤:٢٧ ‎ب.ظ ; ۱۳۸۸/۳/۱٧
تگ ها:
comment نظرات () لینک


+ من سئودالیام

من بو دونیادا

سئودالی یاشاییرام

گوز یاشینان سئوگی گوریرام

من داغلار قایاسیندا داشلارینان دوسام

قارقالارینان چالیشیرام

بونالار کولگه سیندا یاتیرام،گوز آرخاما تیکیرم

اوغشایا اوغشایا چاغیریرام

بو یول کیمینگ ؟اولکه کیمینگ؟

گئدن دورنالار ،کوچن سونالار،

دونیا کیمینگ؟

من بویانا، سن اویانا

بیز هایانا داغیلمیشاگ

بیرلیگ اولموش

آما من وارام ،سنده وارانگ

من بو دونیادا سئودالی یاشاییرام

سن نیجه ؟

 

نویسنده : فتانه مرادی قره قانی ; ساعت ٥:٢۳ ‎ب.ظ ; ۱۳۸۸/۱/٢٤
تگ ها:
comment نظرات () لینک


+ آی دا کیم وار ؟

آی دا کیم وار ؟

 

 

آیایدین گئجه لر الوولی کوزلر قیراقیندا کی قره آفتافا چاهئسی قینییر و چولوسکی لر یانماگی سسی قولاقا دییر آرخا اوستونه اوزانموشام .

گوزوم باغلی سرئین یئل اسیر یئل اوزومو ال چکیر بوجگیللر سسی ده گلیر  تیلکی لر اوولاماگی دا اونا قوشولور نه ائشیدمه لی دیر . دئیلدر بایقوش سسی کاسلی دیر بو گئجه اونونگ سسی ده گلیر بئلمه گلیر او آغلاییر اوز قره بختینه .

تیتیرمگ ایچیمه گیرمیش سووقوم ائدیر قئچیمینگ باش بورماقینان اوودون لاری اوت ایچینه ایتیلییرم ، گوزومو آچیرام وااااااااااااای ناغاد اولدوز کی قاش و گوز آتیر اوزومه دئیرم هانسی منیم آللینجاق اولدوزوم دیر  . او ساق تایداکی بویوگ رگ دیر ..... یوو یوو او سول تایداکی پارلاق رگ دیر یا کی او.......

بو دوشونجه یه گئدیرم کی هر کیمسه ده بیر اولدوز وار اولسا  په بو دونیا دا چوخ کیمسه دئرلیگ ائدیر کی گورنگ هاموسی منیم تک آللینجاقینی تاپیر یا کی یوو ....

ائله بوردا گوزوم آیا دوشیر نه ایشیق دیر رحمتلی بویوگ آنام آساناگینی دیله گتیریرم : آیا باخ نیجه گئدر /اورگنمیش گئجه گئدر

بئلمه گلیر آیدا بیرسی منه باخیر منده اونا باخیرام اوزومنن سوروشیرام آیدا کیم وار ؟ آیدا داغ وار ؟چول وار ؟ سو وار؟ هئچ کیمسه اوردا دئریلیگ ائدیر ؟

اینانیرم کی ائله ایندی بیری منیم تک اوزانموش آی ایچینده الینی باشو آلتونا قویموش و منه باخیر .

آهای آیدا کی آدام سلام منی گوریرنگ یولداش منم یئرده کی آدام سن کی اولدوزلارینگ یخینیندایانگ گوره م منیم اولدوزومو تاپا بیلدانگ ؟

آهای یولداش اگه سسیمی ائشیدیرنگ بیر اولدوز آت کوتا تا من بیلم کی وارانگ وااااااااای او منه باخیر او آیدا کی منی گوریر او قویروقلو اولدوزه باخ اونو منیم ایچون آتدی .

الیمی اوزادیرام و اونونگ چون ال  بولیرم ،گئنه سووق منی اوزوما گتیریر قووزانیرام و چاهی ده ایچیرم الیمه اوت اوستونا توتیرم تا قیزیشه ایندب داها ایناندیم کی آیدا بیری وار آما کیم وار ؟

 

نویسنده : فتانه مرادی قره قانی ; ساعت ۸:۱۱ ‎ق.ظ ; ۱۳۸۸/۱/۱٩
تگ ها:
comment نظرات () لینک


+ ائل گئتدی گردی قالدی گون گئتدی زردی قالدی

نویسنده : فتانه مرادی قره قانی ; ساعت ٩:۳٦ ‎ق.ظ ; ۱۳۸٧/۱٢/٢٠
تگ ها:
comment نظرات () لینک


+ یولداش منه قیش گلدی

گئنه گوزوم هواسیندا ایلدیریم شاخدی بولوت کیپریکیمدن سیخیلدی ویاش یاغدی . چوخ گوز بو یاغیش اینتظارینی چکدی آما یاغاندان سورا هئچ کیم شوکور دئمدی.

گئنه باشیما قار دوشدی دومان چوکدی و گوزلر سووندو یاناخلاری سووق ووردو و پوسسوردو غیغی دوداغی گولوش دن سالدی .منه قیش گلدی یولداش قیش گلدی....

 

نویسنده : فتانه مرادی قره قانی ; ساعت ٩:۳٠ ‎ق.ظ ; ۱۳۸٧/۱٢/٢٠
تگ ها:
comment نظرات () لینک


← صفحه بعد